Parisdə Azərbaycanda məhkum edilmiş ermənilərə həsr olunan sərgi hazırlanır – Səfirlikdən sərt REAKSİYA

Fransanın paytaxtı Parisdə Azərbaycanda məhkum edilmiş ermənilərə dəstək məqsədilə sərginin keçirilməsinə hazırlıq görülür.

Məlumata görə, sərginin Paris meriyasının dəstəyi ilə təşkil edilməsi nəzərdə tutulur. Təşəbbüs Azərbaycan-Fransa münasibətləri və Bakı ilə İrəvan arasında sülh prosesinin davam etdiyi bir dövrdə gündəmə gəlib.

Sərginin Azərbaycanda hərbi cinayətlər və insanlıq əleyhinə cinayətlər törətməkdə təqsirləndirilərək məhkum edilmiş şəxslərə həsr olunacağı bildirilir. Təşəbbüsə münasibət bildirənlər sərgidə Qarabağ münaqişəsi zamanı azərbaycanlılara qarşı törədilmiş cinayətlərin diqqətdən kənarda saxlanılmasının birtərəfli yanaşma olduğunu qeyd edirlər.

Azərbaycanın Fransadakı səfiri Leyla Abdullayeva Paris meriyasına müraciət edərək sərginin ləğv edilməsinə çağırıb.

Məsələ xüsusilə Azərbaycan və Ermənistan arasında sülh gündəliyinin aktuallaşdığı bir vaxtda diqqət çəkir. Bakı və İrəvan uzun illər davam edən münaqişədən sonra münasibətlərin normallaşdırılması istiqamətində addımlar atırlar.

Fransanın erməni məsələsində mövqeyi isə son illərdə Azərbaycan tərəfindən dəfələrlə tənqid olunub.
Qeyd edək ki, sərginin keçirilməsi ilə bağlı məlumat və Azərbaycan səfirinin müraciətinə dair əlavə rəsmi açıqlamaların olub-olmadığı dəqiqləşdirilməlidir.