“İran yeraltı obyektlərdə raket istehsalına başlayıb” - “Ən azı bir neçə yüz raket”

ABŞ və İsrailin ölkənin sənaye infrastrukturuna genişmiqyaslı hücumlarından sonra İran yeraltı obyektlərdə ballistik raket istehsalına başlayıb.

Hurriyyet.media  xəbər verir ki, bunu “The Wall Street Journal” (WSJ) nəşri Vaşinqton və Yaxın Şərqdəki mənbələrə istinadla yazıb.

Nəşrin iddiasına görə, Tehran həm maye yanacaqlı, həm də bərk yanacaqlı raketləri aktiv şəkildə yığır. Kəşfiyyat məlumatlarına görə, istehsal xüsusilə İranın cənub-şərqindəki Xocar yeraltı kompleksində aparılır.

WSJ-nin mənbələri qeyd ediblər ki, ABŞ və İsrail bəzi istehsal müəssisələrini sıradan çıxardığı və dəniz blokadası bərk yanacaq üçün komponentlərin və xammalın idxalını çətinləşdirdiyi üçün raket yığımı hazırda müharibədən əvvəlkindən daha aşağı templə aparılır.

ABŞ hökumətinin rəsmisi nəşrə bildirib ki, Tehran əlindəki mövcud komponentlərdən ən azı bir neçə yüz raket yığa bilir.

Mərkəzi Kəşfiyyat İdarəsinin keçmiş analitiki və London Kral Kollecinin tədqiqatçısı Cim Lamson qeyd edib ki, müharibədən əvvəl İran döyüş başlıqlarını, gövdələri və istiqamətləndirmə sistemlərini ehtiyatda saxlayırdı. İndi isə bunlardan raketlərin yığılması üçün istifadə edir.

"Hədəflər bombalanmadıqda, zədələnmiş infrastrukturu bərpa etmək, digər ölkələrdən yeni komponentlər almaq və onları obyektlərdə saxlamaq mümkündür. İranın öz raket istehsalı imkanlarını bərpa etmədiyini düşünmək üçün son dərəcə sadəlövh olmaq lazımdır", - deyə ABŞ-də yerləşən Raket Müdafiə Alyansının baş analitiki Tal İnbar vurğulayıb.

Ağ Evin nümayəndəsi isə nəşrə Tehranın ballistik raket istehsalına yenidən başlayıb-başlamadığına dair suala birbaşa cavab verməkdən imtina edib, lakin İranın nüvə obyektlərinin "məhv edildiyini" və silahlı qüvvələrinin ciddi şəkildə zəiflədiyini qeyd edib.

Bundan öncə, “NBC News” İranın ABŞ ilə müharibədə atəşkəsdən hərbi potensialını bərpa etmək üçün istifadə etdiyini bildirmişdi.

“AzPolitika.info”